काठमाडौं। बलिउडकी ख्यातिप्राप्त निर्मात्री एकता कपुरले निर्माण गरेको वेव सिरिज ‘एक्सएक्सएक्स अनसेन्सर्ड २’ यतिबेला विवादमा फसेको छ। यो वेव सिरिजको एक भागमा देखाइएको दृश्यले भारतीय सेनाको अपमान गरेको भन्दै निर्माण कम्पनीविरुद्ध उजुरी परेपछि विवादमा परेको हो।
हिन्दुस्तान भाउ नामक संस्थाले मुम्बई प्रहरीमा उजुरी दर्ता गरेपछि एकता कपुरको नाममा अल्टिमेटम पत्र समेत पठाएको छ। जसमा, उनले माफी माग्नुपर्ने र भारत सरकारलाई एक सय करोड जरिवाना पनि तिर्नुपर्ने बताइएको छ।
प्रशारित भाग हटाउनुपर्ने, भारतीय सेनासँग माफी माग्नुपर्ने र जरिवाना स्वरुप भारत सरकारको खातामा सय करोड दिनुपर्ने माग गरेसँगै एकता तनावमा परेको भारतीय समाचार माध्यमहरुले उल्लेख गरेका छन्।
अल्टिमेटमलाई वेवास्ता गरेको खण्डमा सर्वोच्च अदालतमा उजुरी दिने र बालाजी फिल्मस्लाई बहिष्कार गर्ने चेतावनी समेत दिइएको भारतीय समाचार माध्यमहरुले लेखेका छन्।
यो सिरिजमा कलाकार अदिती कोहलीले आर्मी अफिसर्सको पत्नीको भूमिका निर्वाह गरेकी छन्। जहाँ, आफ्ना पति ड्यूटीमा गएपछि उनले एक व्यक्तिलाई घरमा बोलाउँछिन् र पतिको यूनिफर्म लगाएर अन्तरंग दृश्य दिएको दृश्य देखाइएको छ। यो दृश्यलाई हिन्दुस्तानी भाउले भारतीय सेनाको अपमान गरेको भन्दै उजुरी दिएको हो।
