काठमाडौं। विश्वभर महामारीको रुपमा फैलिरहेको कोरोनाभाइरस संक्रमणका कारण हप्तौदेखि लकडाउन भैरहदा विपन्न ज्याला–मजदुरी गरेर परिवार पाल्नेहरुलाई सरकारवाट राहत दिने कार्य भैरहेको छ।
यसक्रममा काठमाडौं महानगरपालिका वडा नंबर ४ मा रहेका विपन्न वर्गहरुलाई काठमाडौं महानगरपालिकाको मापदण्ड अनुरुप आज आइतवारवाट राहत दिने कार्य भएको हो।
काठमाडौं महानगरपालिकाको ठूला वडामध्ये एक ठूलो वडा नंबर ४ स्थित विभिन्न स्थानहरुवाट कुपन सिस्टमवाट व्यवस्थित तरीकाले राहत वितरण गर्ने कार्य भएको वडा नंबर ४ का लोकप्रिय वडा सदस्य दिनेश महर्जनले भिजन संसार डटकमलाई बताएका छन्। वडा सदस्य महर्जनका अनुसार, आज आइतवार ५ सय ६० जना विपन्न वर्गलाई राहत प्रदान गरिएको छ।
वडाका घरघर पुगेर सही विपन्न वर्गलाई पहिचान गरेर उनीहरुलाई मात्र राहत वितरण गर्ने कार्य भएको वडा सदस्य महर्जनको भनाई रहेको छ।
राहतको लागि २ हजारभन्दा बढीले फारम भरेतापनि यथार्थ पहिचान गरेर सही विपन्न वर्गलाई मात्र राहत प्रदान गरिएको हो। नपुग भएको स्थानमा भोलि सोमवार पनि राहत वाँडिने वडा सदस्य महर्जनले भनेका छन्।
