काठमाडौं। नेपालमा यो महिना पटक पटक गरेर दुई पटक पेट्रोलियम पदार्थमा मूल्य बृद्धि गरेको छ। पछिल्लो पल्ट सरकारले मंगलबार रातिदेखि लागू हुने गरी पेट्रोलमा प्रतिलिटर २ रुपैयाँ बढाएको छ। नयाँ मूल्यसूचीअनुसार पेट्रोल १ सय १४ रुपैयाँ, डिजेल ९७ रुपैयाँ, मट्टीतेल ९७ रुपैयाँ र हवाई इन्धन ६७ रुपैयाँ कायम भएको छ । आयल निगमले कायम गरेको पेट्रोलको मूल्य साढे २ वर्षयताकै उच्च हो ।
पेट्रोलियम पदार्थमा लगाइएको शतप्रतिशत करका कारण सर्वसाधारण इन्धन खरिदमा चर्को मूल्य तिर्न बाध्य भएका छन् । यसले इन्धनसँग अन्तरसम्बन्धित सबैजसो सामग्रीको भाउलाई प्रभावित गरेको छ । यसले सर्वसाधारण चर्को मूल्य बृद्धिको मारमा पर्ने निश्चित छ। यसको विरोध गर्दै विहीवार विहान नेकपाको दाहाल–नेपाल समूहनिकट विद्यार्थीले काठमाडौंमा प्रदर्शन गरेका छन् ।
नेकपाको भ्रातृ संगठन अनेरास्ववियुले प्रदर्शनी मार्गस्थित रत्नराज्य क्याम्पसअगाडि विरोध प्रदर्शन गरेको हो । प्रदर्शनकारीले पेट्रोलियममा गरिएको मूल्यवृद्धि सरकारले तत्काल फिर्ता लिनुपर्ने भन्दै नारा लगाएका थिए । अनेरास्ववियुले प्रतिनिधिसभा विघटन र पेट्रोलियममा मूल्यवृद्धिविरुद्ध बिहीबार देशभरका क्याम्पसमा विरोध प्रदर्शन गर्ने कार्यक्रम अनुरुप उक्त कार्य गरेको जनाएको छ। मूल्यवृद्धि फिर्ता गर्न उनीहरुले माग गरेका छन्।
प्रकाशन मिति–२०७७ साल फागुन ६ गते विहीवार ।